** 1838ع ۾ اڄوڪي تاريخ تي مير رستم خان ۽ انگريز عملدار
ڪيپٽن برنس وچ ۾ ملاقات ٿي، ڪيپٽن برنس ساڻس ٿيندڙ ٺاهه جو مسودو
حوالي ڪيو ۽ دوستيءَ جي آڇ ڪئي، جنهن کانپوءِ ڪيپٽن برنس کي
مير نور محمد خان ٽالپر جي صحيح ۽ سيل سان جاري ٿيل پروانو ڏنو ويو،
جنهن تحت هو بکر جي علائقي ۾ اناج ۽ ٻيون شيون خريد ڪري پئي سگهيو.
** 1904ع ۾ اڄوڪي تاريخ تي سيٺ هرچند راءِ وشنداس لاڙڪاڻي پهتو ۽
سنڌ هندو سڀا قائم ڪرڻ جي حوالي سان ماڻهن جي حمايت ڪئي،
واضح رهي ته 1885ع ۾ حسن علي آفندي سنڌ سڀا جي اڳواڻن
سان اختلاف ڪندي سنڌ محمدن ايسوسيئيشن قائم ڪئي،
جنهن کانپوءِ سيٺ هرچند راءِ ٻيو سنڌي اڳواڻ هو، جنهن پنهنجي جماعت ٺاهي.
** 1919ع ۾ اڄوڪي تاريخ تي حيدرآباد جي هوم اسٽيڊ هال ۾ هوم
رول ليگ جي گڏجاڻي هيرانند سنتوڪرام جي صدارت ۾ ٿي، جنهن
۾ حڪومت کان مطالبو ڪيو ويو ته بي جي تلڪ ۽ بيپن چندرا جي
پنجاب ۾ آمد تي پابندي ختم ڪئي وڃي، جڏهن ته لالا لجپت راءِ ۽
هري رام کي هندستان وڃڻ جي اجازت ڏني وڃي.
** 1939ع ۾ اڄوڪي تاريخ تي حڪومت مسجد منزل گاهه جو قبضو
پنهنجي ڪنٽرول ۾ وٺي ڇڏيو، جڏهن ته جي ايم سيد، آغا نظر علي
۽ بحالي ڪاميٽي جي ٻين اڳواڻن کي گرفتار ڪيو ويو،
مسجد منزل گاهه واري معاملي سکر ۾ امن امان جو وڏو مسئلو پيدا ڪيو،
صرف ڪجهه ڏينهن اندر 151 هندو ۽ 14 مسلمان مارجي ويا هئا.
** 1958ع ۾ اڄوڪي تاريخ تي خاڪسار تحريڪ جي باني علامه
مشرقي کي جيل مان آزاد ڪيو ويو، کيس ڊاڪٽر خان صاحب جي قتل
ڪيس ۾ گرفتار ڪيو ويو هو.
** 1971ع ۾ اڄوڪي تاريخ تي ڍاڪا ۾ حالتون خراب ٿيڻ بعد حڪومت
ڪرفيو لڳائي ڇڏيو ۽ گهر گهر تلاشي لاءِ آپريشن شروع ڪيو ويو.
** 1972ع ۾ اڄوڪي تاريخ تي سنڌ اسيمبلي ٻوليءَ وارو تاريخي بل منظور
ڪري ورتو، جنهن تي اڳتي هلي گهڻو تڪرار پيدا ٿيو ۽ ٻولي وارا فساد ٿيا.
** 1979ع ۾ اڄوڪي تاريخ تي جماعت اسلامي جو باني مولانا مودودي وفات ڪري ويو.
** 1988ع ۾ اڄوڪي تاريخ تي قومي اسيمبلي جي چونڊن جي آيل
نتيجن ۾ پ پ 92، آءِ جي آءِ 54 ۽ آزاد اميدوارن 40 سيٽون
حاصل ڪيون، واضح رهي ته انهن چونڊن جي نتيجي ۾ پ پ جي
حڪومت قائم ٿي ۽ بينظير ڀٽو ملڪ جي وزيراعظم ٿي.
No comments:
Post a Comment