** 1849ع ۾ اڄوڪي تاريخ تي بمبئي حڪومت سنڌ جي
ڪمشنر کي حڪم جاري ڪيو ته سيٺ نائومل لاءِ ڪو
مناسب عهدو ڳوليو وڃي، هو ڪراچي جو اڳوڻو ڪاردار
رهيو آهي ۽ اسان جو وفادار آهي، جيڪڏهن ائين
ممڪن نه هجي ته گورنر کيس هڪ هزار بگاس
زمين فراهم ڪري، اهو به ذهن ۾ رکيو وڃي ته زمين
ڏيڻ بعد آبپاشي مقصدن لاءِ پاڻي جي فراهمي پڻ
ڪئي وڃي، جڏهن ته کيس ملندڙ گرانٽ تاحيات هوندي.
** 1927ع ۾ اڄوڪي تاريخ تي ڪلڪتي ۾ مولانا محمد علي
جوهر جي صدارت ۾ خلافت ڪانفرنس شروع ٿي،
جنهن ۾ سنڌ مان پڻ ناليوارن خلافتي اڳواڻن شرڪت ڪئي،
اڳواڻن صلاح ڏني ته سنڌ ۾ هندن ۽ مسلمانن وچ ۾
بهتر لاڳاپن لاءِ ڪوششون ڪيون وڃن.
** 1933ع ۾ اڄوڪي تاريخ تي بمبئي ليجسليٽو
ڪائونسل ۾ شاهنواز خان ڀٽو انهيءَ رٿ جي مخالفت
ڪئي ته چونڊ نظام الڳ الڳ نه هجي، ڊاڪٽر ايم ايل
ڊڪشٽ اها رٿ پيش ڪئي هئي ته مختلف ڪارپوريشنز
۾ گڏيل چونڊ نظام لاڳو ڪيو وڃي.
** 1952ع ۾ اڄوڪي تاريخ تي پاڪستان جي آئين جو
مسودو تيار ڪيو ويو، اهڙي دعويٰ حڪومت طرفان
ڪئي وئي پر ان دعويٰ باوجود پاڪستان ۾ وڏي
عرصي تائين آئين نه اچي سگهيو.
** 1957ع ۾ اڄوڪي تاريخ تي ويسٽ پاڪستان
ڪابينا فيصلو ڪيو ته غلام محمد بئراج (ڪوٽڙي بئراج)
جون زمينون فوري طور تي هارين کي ڏنيون وڃن.
** 1971ع ۾ اڄوڪي تاريخ تي نيشنل عوامي پارٽي
جي سيڪريٽري جنرل محمودالحق عثماني کي گرفتار ڪيو ويو.
** 1973ع ۾ اڄوڪي تاريخ تي سنڌو درياءَ ۾
آيل ٻوڏ جي نتيجي ۾لاڙڪاڻو ضلعو سخت متاثر ٿيو،
درياءَ جو پاڻي شهر جي چوڌاري ڦهلجي ويو،
جنهن ڪري شهرين ۾ خوف واري صورتحال پيدا ٿي وئي،
سرڪار ماڻهن جي تحفظ لاءِ سمورن ادارن ۾ ايمرجنسي
لاڳو ڪري ڇڏي. وزيراعظم ذوالفقار علي ڀٽو پهچي
علائقن جو دورو ڪيو، هو پاڻي هيٺ علائقن ۾ به ويو.
** 2000ع ۾ اڄوڪي تاريخ تي پشاور ۾ عوامي
نيشنل پارٽي طرفان تڪراري ڪالاباغ ڊيم جي
معاملي تي ڪوٺايل ڪانفرنس ۾ ملڪ جي مڙني
سياسي پارٽين جي اڳواڻن ۽ پنجاب جي دانشورن
به ڊيم کي رد ڪري ڇڏيو،ڪانفرنس جو گڏيل پڌرنامو
به جاري ڪيو ويو.جنهن ۾ چيو ويو ته
ڪالاباغ ڊيم ٺاهيو ويو ته ملڪ ٽٽي ويندو.
No comments:
Post a Comment