** 1930ع ۾ اڄوڪي تاريخ تي ڪراچي ۾ جمعيت علماءَ جي
اليڪشن ٿي، جنهن ۾ قاضي فتح علي شاهبندري، مولوي فتح علي سجاولي صدر
۽ نائب صدر چونڊيا ويا، جڏهن ته ايگزيڪيوٽو ڪاميٽيءَ ۾ مولوي قاضي محمد،
مولوي محمد عثمان، مولوي محمد اشرف ۽ مولوي محمد حسين صديقي شامل هئا.
** 1932ع ۾ اڄوڪي تاريخ تي هندستاني سرڪار انڊين ڪرمنل لا
ترميمي ايڪٽ 1908ع تحت حيدرآباد ضلعي جي ڪانگريس ڪاميٽي
کي غير قانوني قرار ڏئي ڇڏيو ۽ ان سان لاڳاپيل ٻين تنظيمن تي پڻ پابندي هنئي وئي.
** 1941ع ۾ اڄوڪي تاريخ تي ڪراچي ۾ لطيف ڏهاڙو ملهايو ويو،
ان حوالي سان تعليم واري وزير شيخ عبدالمجيد سنڌي تقريب جو افتتاح ڪيو،
جڏهن ته صدارت ناليواري اسڪالر علامه آءِ آءِ قاضي ڪئي.
** 1950ع ۾ اڄوڪي تاريخ تي گورنر جنرل آف پاڪستان خواجه ناظم الدين
ڪوٽڙي پل جي پيڙهه جو پٿر رکيو.
** 1966ع ۾ اڄوڪي تاريخ تي عوامي ليگ جي سربراهه شيخ مجيب
الرحمان ڪراچي ۾ پنهنجن 6 نقطن جو اعلان ڪيو. جنهن ۾ پهريون
نقطو اهو هو ته پاڪستان جو آئين 1940ع جي قرارداد مطابق
ٺاهيو وڃي، ٻيو ته ايسٽ ۽ ويسٽ پاڪستان لاءِ ڌار ڌار ڪرنسي رکي وڃي،
ٽيون نقطو هو ته وفاق وٽ رڳو دفاع ۽ پرڏيهي معاملا رکيا وڃن،
باقي سڀ اختيار صوبن کي منتقل ڪيا وڃن. چوٿين نقطي ۾ چيو ويو
ته ٽيڪسن جي اوڳاڙي ۽ انهن جي خرچ جو اختيار صوبن کي ڏنو
وڃي، پنجون نقطو هو ته پرڏيهي ناڻي جا ذخيرا وڌيڪ آمدني وارا
صوبا استعمال ڪن ۽ ڇهون نقطو هو ته هر صوبو پنهنجي ڌار پيرا
ملٽري فورس ٺاهڻ جو اختيار رکي.
**1994ع ۾ اڄوڪي تاريخ تي ناروي مان چور دنيا جي مشهور ترين
پينٽنگ چوري ڪري ويا، اوسلو جي آرٽ گيلري ۾ موجود اها پينٽنگ
واپس ڪرڻ لاءِ آرٽ گيلري جي انتظاميا کان 10 لک ڊالر ڀنگ طلب
ڪيو ويو. اها پينٽنگ ناروي جي ثقافت کي ظاهر ڪري رهي هئي.
No comments:
Post a Comment