** 1843ع ۾ اڄوڪي تاريخ تي هندستان جي گورنر جنرل
سنڌ جي گورنر کي هدايت جاري ڪئي ته ٽن قلعن گٽوراهه،
شاهه ڳڙهه ۽ گڙيسا جو ڪنٽرول هز هائينس
مير علي مراد خان ٽالپر حوالي ڪيو وڃي.
** 1920ع ۾ اڄوڪي تاريخ تي انگريزن خلاف
جدوجهد ڪندڙ خلافت ڪاميٽي جي ڏنل سڏ جي موٽ
۾ ميرو خان ۾ وڌيڪ ڪيترن ئي سرڪاري ملازمن
نوڪريون ڇڏي ڏنيون، انهن ۾ پوليس اهلڪار الهڏنو،
وڏيرو لطف علي خان، وڏيرو رسول بخش خان،
وڏيرو يار علي خان، وڏيرو محمد بچل تنيو ۽ ٻيا شامل هئا،
ڪيترن ئي ملازمن اسڪول بورڊ ميمبر شپ تان استعيفيٰ ڏني.
** 1928ع ۾ اڄوڪي تاريخ تي سنڌ خلافت ڪاميٽي احتجاج
طور مڪاني چونڊن جي بائيڪاٽ جو فيصلو ڪيو ۽
پارٽي ميمبرن کي هدايت ڪئي وئي ته
ڪوبه اڳواڻ چونڊن ۾ حصو نه وٺي.
** 1945ع ۾ اڄوڪي تاريخ تي قائد اعظم محمد علي جناح
بمبئي ۾ ٿيل هڪ گڏجاڻي کي خطاب ڪندي چيو ته
ورهاڱي جي حوالي سان اسان حتمي معاهدي طرف وڃي
رهيا آهيون.سموري تياري مڪمل وئي آهي.
** 1946ع ۾ اڄوڪي تاريخ تي آل انڊيا مسلم ليگ جي
سيڪريٽري لياقت علي خان اعلان ڪيو ته
جيڪڏهن مرڪز ۾ ڪانگريس جي حڪومت
ٺاهڻ جا امڪان پيدا ٿيا ته اهو مسلم ليگ لاءِ هڪ
سگنل هوندو ته اها پنهنجو ڊائريڪٽ ايڪشن
ڊي جو پروگرام شروع ڪري، اسان مرڪز ۾
ڪانگريس جي حڪومت جي قيام جي مخالفت ڪنداسين.
** 1947ع ۾ اڄوڪي تاريخ تي لياقت علي خان پنهنجي
خاندان جي ماڻهن سان گڏ ڀارت مان خصوصي جهاز
۾ ڪراچي پهچي ويو. هن هندستان مان لڏي ايندڙ ماڻهن
کي سنڌ ۾ وڌ ۾ وڌ آباد ڪرڻ ۾ اهم ڪردار ادا ڪيو.
** 1955ع ۾ اڄوڪي تاريخ تي ميجر جنرل اسڪندر مرزا
کي ملڪ جو وقتي گورنر جنرل مقرر ڪيو ويو،
جڏهن ته ملڪ غلام محمد کي موڪل تي روانو ڪيو ويو.
** 1974ع ۾ اڄوڪي تاريخ تي وزيراعظم ذوالفقار علي ڀٽو
سنڌ جي تاريخي ماڳ موهن جو دڙو
جي تحفظ جو حڪم جاري ڪيو.
** 1990ع ۾ اڄوڪي تاريخ تي صدر غلام اسحاق خان
اسيمبليون ٽوڙي ڇڏيون ۽ بينظير ڀٽو جي حڪومت
کي برطرف ڪري ملڪ ۾ ايمرجنسي لاڳو ڪري ڇڏي،
جڏهن ته رئيس غلام مصطفيٰ جتوئي کي
نگران وزيراعظم مقرر ڪيو ويو
** 1993ع ۾ اڄوڪي تاريخ تي بينظير ڀٽو اليڪشن
ڪميشن جي انهيءَ فيصلي تي ناراضگي جو اظهار ڪيو،
جنهن ۾ چيو ويو ته چونڊن ۾ هر پولنگ تي ووٽ ڏيڻ لاءِ
شناختي ڪارڊ لازمي طور پيش ڪرڻو پوندو.
No comments:
Post a Comment